Su l’ gôche, c’èst l’ côrps-di-logis : di l’onk èt d’ l’ôte dès costès do gros uch di tchin.ne, al valèye èt è là-wôt, one finièsse nin foû grande avou dès p’tits cârôs. Deûs pwârîs d’èspalier tapissèt l’ meur di leûs coches bin drwètes, qui gripèt à dès fils. Pus lon, mètûwes è djane coleûr, c’èst l’ pwate dol grègne, li cine dol fwadje èt, pa d’zeû, lès bawètes do cina. Dizos lès tchènôs, brâmint dès nids d’oronde èt, on pô pus bas, lès trôs d’ mani sont rimplis d’ mouchons d’ teut.

En-z-intrant, vos v’là o coridôr, qui passe tot-iute do bâtimint èt done su l’ djârdin pa l’uch di drî. Deûs places à mwin gôche, li cûjène èt l’ tchambe padrî ; di d’ là, vos moussoz d’ plin-pîd ol pitite côve. A mwin drwète, c’èst l’uch dol tchambe al valéye, qui siève en minme timps di sâlon èt d’ sale à manger, li ci d’è là-wôt èt l’ ci do forni ; en d’chindant saquants toûrnantès montéyes di pîre, vos-arivoz ol côve. Satchoz l’uch do plantchi : al copète dès montéyes, vos-èstoz dins on coridôr qui done su lès tchambes di d’zeû. Dès montéyes pus rwèdes vos mineront o gurnî.

Come vos vèyoz, one bèle grande môjon do timps passè. Li fond dès wôtès tchiminèyes a stî gârni dins l’ timps dol take di fonte, rètouréye di briques. Li crama toûrneut su sès pinteures po-z-aminè l’ tchôdron, li cokmwâr ou l’ cabolia dizeû lès-andîs. Asteûre, i n’ dimeure pus rin d’ tot ça. Li stûve-crapôd à plate bûse a pris l’ place do fiêr-à-feû. Més, dissus l’ djivô, vos vièroz co l’ bon diè d’ keûve inte lès deûs tchandelès. Lès plafonds sont blankis à l’ tchôs´, lès meurs tapissès d’ papî à fleûrs. On lambris mètu è coleûr toûne ôtoû dès places, bwardè d’one plinte pa-d’zos èt d’one gréye cimése à wôteû dès tchèrîyes. Lès pavéyes sont en cârôs d’ cimint avou dès dèssins. I-gn-a qui l’ tchambe padrî, li p’tite côve èt l’ forni qu’ont ôrdè leûs dales di bleûwès pîres.

En fét d’ meûbes, vos trouveroz ol cûjène li grosse drèsse di vî tchin.ne, avou sès deûs-uch gârnis d’intréyes di sèrure en keûve èt sès pèsants ridans, one longûwe tôve di blanc bwès èt dès finès tchèrîyes di èsse avou li d’zeû tot k’trawè. O fond dol tchiminéye, li bwèsse à sé èst pindûwe à on clô ; pa-d’zeû, c’èst l’ quinquèt à pètrole, qu’a remplacè l’ crassèt à l’ôle, èt l’ vagon ôs-alumètes. Ol tchambe padrî, i-gn-a l’wôte ètajére po mète lès casseroles, li djusse di bleûwe pîre avou l’ ramponô, li molin èt lès bwèsses di blanc fiêr po l’ cafè èt l’ chicoréye ; pa d’zos, lès sèyas èt lès saliètes, avou l’ goria dins l’ cwin ; su li p’tite tôve, li s’gotwè po fè l’ bagadje. Ol pitite côve, lès tonias d’ bîre sont su lès djantîs ; li pwin, li bûre èt tote l’amonucion o gârde-manger ; li wadje èt l’ laton po lès bièsses dins lès outches. One rayîre î done djoû èt l’ ranérit. Lès canadas, lès pétrâtes èt lès rècènes rimplichèt l’ côve al valéye. Ol tchambe, one ronde tôve è mitan, dès tchèrîyes rascouviéyes di strin li long dès meurs, on chris´ dorè d’zos on globe su l’ tchiminéye inte deûs vâses di pôrçulin.ne tot cafloris. Li pus bia dès meûbes, c’è-st-on bufèt à cârôs dizeû deûs ridans èt one drèsse.

Totes lès vîserîyes dol môjon èburtakèt lès sovrondes do gurnî ; ôs poûtrèles èt ôs tch’furons, on-z-a acrotchi avou dès crampons dès fis d’ârca po mète souwè l’ bouéye pa timps d’ pleuve.

Tot-ôtoû do bâtimint, c’èst lès-ayèsses di totes lès sôtes : li forni-al-copète avou l’ méye su l’ tôve èt l’ for po cûre, lès rans d’ couchèt, li pouyetrîye, li stôve dès bèrbis, li trô ô tchèrbon èt l’ bôr po mète lès fagots à iute.

Padrî, c’è-st-on bia grand corti. Dès pasias bwardès d’ pôquîs li dispôrtèt è quate cârès. On-z-î fét v’nu totes lès légumes, lès canadas, lès-ièbes po fè l’ sope. Dins on cwin, addé l’ rubarbe, li jolibwès stind d’zeû l’ meur di Bèl-Ér sès coches qui sintèt bon do trèvint d’ Pôques. Lès piyônes donèt à pléji dès grossès rotchès fleûrs po gârni l’ finièsse al porcèssion. Pus lon, voci lès blankès fleûrs qui florichèt jusse po l’ quinze d’awous´. Lès plates- bindes sont rimplîyes di pinséyes di totes lès coleûrs, di solias, di rôses d’Éjipe, di murèts bruns èt djanes : di qwè gârni lès fosses al cimintiére po l’ Tossint.

Douvioz l’ôje ô fond do corti, passoz li p’tit pont su l’ ri èt vos v’là o prè, on bia grand prè di deûs djurnôs (1), plantè d’ pomîs, di prônîs, di biokîs, avou on pwârî d’ monseû èt on grand démon d’ mérabèlî à l’intréye. Li p’tit ri Sint- Ôlin, bwardè d’ôrnias èt d’ wèsîres frumejîye su lès pîres ou s’astôdje dins lès gofes ; dès trûtes spitèt d’ tos lès costès èt vont s’ rimète dizos lès boéyes (2).

Vos-avoz insi one idéye do p’tit bin dol famile Leloup-Collard, tél qu’il èsteut quand l’ grand Djan-Piêre Louviô, li fi do P’tit Marchô èt li-minme marchô di s’ mèstî, î a v’nu d’meurè en 1900, après-awè mariè one dès fèyes dol môjon, Marîye d’èmon l’ Leûp (3), come on d’jeut à Céles.